सिद्धगिरी हॉस्पिटलमध्ये अतिदुर्मिळ ब्रेन बायपास शस्त्रक्रिया!

सिध्दगिरी हॉस्पिटलने रचला जागतिक वैद्यकीय इतिहास : जगातील पहिली १७ तासांची अतिदुर्मिळ ब्रेन बायपास शस्त्रक्रिया यशस्वी

जागतिक ख्यातीचे न्यूरोसर्जन डॉ. शिवशंकर मरजक्के आणि टीम यांच्या नेतृत्वाखाली ऐतिहासिक कामगिरी

कणेरी, कोल्हापूर | दि. १० जून २०२६

सिध्दगिरी हॉस्पिटल अँड रिसर्च सेंटर, कणेरी येथील न्यूरोसर्जरी विभागाचे प्रमुख व वैद्यकीय संचालक, जागतिक ख्यातीचे मेंदू शल्यविशारद डॉ. शिवशंकर मरजक्के यांच्या नेतृत्वाखाली जगातील पहिली मानली जाणारी १७ तासांची अतिदुर्मिळ ब्रेन बायपास शस्त्रक्रिया यशस्वीपणे पूर्ण करून जागतिक वैद्यकीय क्षेत्रात नवा इतिहास रचला आहे. या ऐतिहासिक यशामुळे ग्रामीण महाराष्ट्रातील एका धर्मादाय रुग्णालयाने जागतिक वैद्यकीय क्षेत्राचे लक्ष वेधून घेतले आहे.

ग्रामीण भागातील सर्वसामान्य रुग्णांना महानगरांप्रमाणेच जागतिक दर्जाच्या वैद्यकीय सेवा उपलब्ध व्हाव्यात, या दूरदृष्टीतून सिध्दगिरी मठाचे मठाधिपती परमपूज्य श्री श्री अदृश्य काडसिद्धेश्वर स्वामीजी यांच्या प्रेरणेने सिध्दगिरी हॉस्पिटलची उभारणी झाली. आज त्याच संकल्पनेचे मूर्त स्वरूप म्हणून सिध्दगिरीने आंतरराष्ट्रीय वैद्यकीय क्षेत्रात आपले स्थान निर्माण केले आहे. रुग्णसेवा, संशोधन आणि अत्याधुनिक वैद्यकीय तंत्रज्ञान यांचा संगम घडवत संस्थेने आरोग्यसेवेचा एक नवा आदर्श निर्माण केला आहे.

केसची गुंतागुंत

सदर रुग्णाला Cavernous Internal Carotid Artery (ICA) Aneurysm हा अत्यंत धोकादायक आणि दुर्मिळ आजार होता. मुख्य आव्हान असे होते की, Persistent Primitive Trigeminal Artery (PPTA) — जी एक भ्रूणावस्थेतील अतिदुर्मिळ रक्तवाहिनी आहे — ती ICA च्या त्याच अ‍ॅन्युरिझम असलेल्या भागातून निघत होती.

संपूर्ण पोस्टेरिअर सर्क्युलेशन, ब्रेन स्टेम व लहान मेंदू यांना रक्तपुरवठा करणारी ही PPTA एकमेव रक्तवाहिनी होती. लहान मेंदूला रक्तपुरवठा करणाऱ्या दोन्ही व्हर्टेब्रल आर्टरीज जन्मतःच अस्तित्वात नव्हत्या.

वैद्यकीय साहित्य आणि जागतिक संशोधनामध्ये अशा प्रकारच्या रुग्णाची नोंद यापूर्वी कधीही झालेली नसल्याने ही केस अत्यंत दुर्मिळ आणि अभूतपूर्व मानली जात आहे. या परिस्थितीत शस्त्रक्रियेतील अगदी छोटी चूकसुद्धा रुग्णासाठी जीवघेणी ठरू शकत होती. मेंदूच्या महत्त्वाच्या भागांचा रक्तपुरवठा कायम राखत धोकादायक रक्तवाहिनीचे सुरक्षित व्यवस्थापन करणे हे अत्यंत मोठे आव्हान होते.

१७ तास चाललेल्या या हाय-फ्लो बायपास शस्त्रक्रियेत न्यूरोसर्जरी, न्यूरो अॅनेस्थेशिया, न्यूरोफिजिओलॉजी, रेडिओलॉजी आणि नर्सिंग विभागातील तज्ज्ञांनी सलग १७ तास अत्यंत एकाग्रतेने, अचूक नियोजनाने आणि उत्कृष्ट समन्वयाने काम करत ही शस्त्रक्रिया यशस्वी केली.

जागतिक ख्यातीचे मेंदू शल्यविशारद डॉ. शिवशंकर मरजक्के यांनी यापूर्वी १०० हून अधिक ब्रेन बायपास शस्त्रक्रिया यशस्वीपणे केल्या आहेत. या समृद्ध अनुभवाच्या बळावरच वैद्यकीय साहित्यात यापूर्वी नोंद नसलेल्या या अतिदुर्मिळ आणि जटिल आजारावर यशस्वी उपचार करणे शक्य झाले.

“Textbooks didn’t have this. 100+ bypasses of experience did.”

हा अनुभवच या यशामागे होता.

राष्ट्रीय सन्मान

या जागतिक कामगिरीची दखल घेत Neurological Society of India (NSI-BOE) या देशातील सर्वोच्च न्यूरोलॉजिकल संस्थेने दिनांक १३ व १४ जून २०२६ रोजी आयोजित करण्यात येणाऱ्या प्रतिष्ठित NSI-BOE Brain Bypass Workshop साठी सिध्दगिरी हॉस्पिटलची निवड केली आहे.

विशेष म्हणजे भारतातील एखाद्या ग्रामीण धर्मादाय रुग्णालयाला प्रथमच हा मान मिळत आहे. या कार्यशाळेत देशभरातील नामवंत न्यूरोसर्जन्स, मायक्रोव्हॅस्क्युलर तज्ज्ञ आणि प्रशिक्षणार्थी डॉक्टर सहभागी होणार असून ब्रेन बायपास सर्जरी, मायक्रोव्हॅस्क्युलर अॅनास्टोमोसिस, रिव्हॅस्क्युलरायझेशन तंत्रज्ञान आणि अत्याधुनिक न्यूरोसर्जिकल कौशल्यांचे प्रत्यक्ष प्रशिक्षण दिले जाणार आहे.

डॉ. शिवशंकर मरजक्के यांचे मनोगत

“ही केवळ रक्तवाहिनीची बायपास शस्त्रक्रिया नव्हती, तर वैद्यकीय क्षेत्रातील अशक्यतेच्या सीमेलाच दिलेले आव्हान होते. ही कौशल्य, विज्ञान आणि आत्म्याची मॅरेथॉन होती. १७ तासांच्या अखंड समन्वित कामातून नवा विक्रम रचला गेला. ही शस्त्रक्रिया कोणत्याही मेट्रो शहरातील कॉर्पोरेट हॉस्पिटलमध्ये किंवा मोठ्या केंद्रीय संस्थेत झाली नाही. ती सिध्दगिरीसारख्या ग्रामीण धर्मादाय रुग्णालयात झाली.”

“पाठ्यपुस्तकांमध्ये याचे उत्तर नव्हते, परंतु शंभरहून अधिक ब्रेन बायपास शस्त्रक्रियांच्या अनुभवातून हे शक्य झाले. या कामगिरीची दखल घेऊन न्यूरोलॉजिकल सोसायटी ऑफ इंडिया या न्यूरोसर्जरी क्षेत्रातील सर्वोच्च संस्थेने ब्रेन बायपास कार्यशाळेसाठी सिध्दगिरी हॉस्पिटलची निवड केली आहे. या कार्यशाळेसाठी देश-विदेशातील न्यूरोसर्जन्स येथे येत आहेत.”

“हा ‘Care Beyond Cure’ आणि ‘Work is Worship – काम ही कैलास’ याचा पुरावा आहे. पूज्य स्वामीजींच्या आशीर्वादाने आम्ही हा जागतिक टप्पा गाठू शकलो.”

सध्या रुग्णाची प्रकृती उत्तम असून तो समाधानकारकरीत्या बरा होत आहे. या ऐतिहासिक शस्त्रक्रियेचा शास्त्रीय अहवाल आंतरराष्ट्रीय वैद्यकीय जर्नलमध्ये प्रकाशित करण्याची प्रक्रिया सुरू असून भविष्यात ही केस जगभरातील न्यूरोसर्जन्ससाठी मार्गदर्शक ठरणार आहे.

या अभूतपूर्व यशाबद्दल परमपूज्य श्री श्री अदृश्य काडसिद्धेश्वर स्वामीजी यांनी जागतिक ख्यातीचे मेंदू शल्यविशारद डॉ. शिवशंकर मरजक्के, न्यूरो भूलतज्ञ डॉ. प्रकाश भरमगौडर, डॉ. अंकुश पराते (सहाय्यक न्यूरोसर्जन), ऑपरेशन थिएटर नर्सिंग स्टाफ, तंत्रज्ञ आणि सर्व सहकारी कर्मचाऱ्यांचे अभिनंदन केले.

ग्रामीण भागाला जागतिक दर्जाचे उपचार देण्याच्या सिध्दगिरीच्या ध्ययाला या यशामुळे नवी ओळख मिळाल्याचे त्यांनी नमूद केले. तसेच भविष्यातही संशोधन, वैद्यकीय उत्कृष्टता आणि रुग्णसेवेच्या माध्यमातून समाजसेवेची परंपरा अधिक बळकट होत राहील, असा विश्वास व्यक्त केला.

या जागतिक यशामागे कार्यरत असलेल्या सर्व डॉक्टर, नर्सिंग स्टाफ, तंत्रज्ञ आणि सहाय्यक कर्मचाऱ्यांचे विशेष अभिनंदन करण्यात येत आहे. त्यांच्या अथक परिश्रम, अचूक नियोजन, उत्कृष्ट टीमवर्क आणि रुग्णसेवेप्रती असलेल्या समर्पणामुळेच हा जागतिक विक्रम शक्य झाला आहे.

रुग्ण सेवा हीच ईश्वर सेवा | Care Beyond Cure

जागतिक दर्जाची आरोग्यसेवा ग्रामीण भारतापर्यंत पोहोचविण्याच्या ध्येयाचा सिध्दगिरी हॉस्पिटल अँड रिसर्च सेंटरचा आणखी एक ऐतिहासिक टप्पा.